অসুখ
আঈ, তুই যতোয় ঠাকুর মানাচিনা করিস
উপাস থাকি পুজা দিস,কইতাের জবো দিয়া-
মাের বুকের বিষ কমেনা। শুলায় বুকোত। হানে।
চিনচিনি বিষায়, নাত্তি হইলে বাড়ে।
আঈ, তাের ঠাকুরও বদলি গেইছে, মুড়িয়া মাসান
এলা আর দইচূড়া আটিয়া কলা খায় না।
দাওয়া
খালি দোয়ারের ঘাস আর খ্যার খােয়াইলে
গাইএর দুধ বাড়ে না অ্যালা, উল্টা কমে -
খৈল নাগে, ভুষি নাগে, ভুট্টার গুড়া নাগে,
আর চারিত ছিটা খায় আঙ্গুল ভরা নুন।
স্বপোন
তাের হাতের দাইগলা ক্যাতাত সুক আছে,
ভােগচাউলের বাসােনা আছে, ভালােবাসার।
কাটোল খুটা দিয়া বানে নেওয়া তাের পিড়াখান,
সিথান দিবার নাগে, ঠাকুর বসাইতেও নাগে।
জাগােরণ
সব রং গাত মাখি হলদিরাম পকি রাজা অ্যালা।
গচের আগালােত বসি আছে।
মােক আর কততা আলােক নুতুরি করি রাখির চাইস?
নিলনিলা আগাল না চড়িলে পকিটা ধরা যাবেনা।
কবি পরিচিতি:
নাম— শৈলেন দাস
প্রকাশ পাওয়া কবিতার বই: ভাঙা খলাইয়ের গান।
বাড়ি: থানেশ্বর হাট, কোচবিহার, ভারত।
হালিচা:
শৈলেন দাস