মোর কলিজাখান ধুকপুক করি উঠে!
হিয়ার মইধ্যত চিনচিনি উঠে বাঁও!
কাঁটা তারের বেড়ার ফাকত যেলা
তোর চান মুখের ছবি দেখির পাও।
দিদিরে!ঐ যে দ্যাশ ভাগের সমেই
ইন্ডিয়ার ভিতিরা যায়া সান্দালু;
চোখুর জলছাড়ি মোর মাথাত হাত বুলাইছিলু!
এলাও মোর মনত পরে দিদিরে-
ম্যালা দিন গেইল গত হয়া,
শুনচুঙ তোর নাকি ভেইল্লা সংসার
তারে বাদে ভুলিছিস মোর মায়া
কাক পক্ষিগিলা ভোর-সাকালে
কা-কা করি, কী-বা খবর কয়?
মনত পরে তোর মায়াবি মুখখান
তোর বাদে পরাণটা আউলি যায়।
মুই দৌড়ি আইসোঙ্ কাঁটা তারের বগলত;
কিন্ত! ঐ যে ১০৫২ পিলারটা,
মোক মনে করি দেয়,
ওপাকে যাওয়া যাবান্নয়!
ডুকুরি-ডুকুরি কান্দঙ মুই, কান্দে ভেতরটা।
আকাশ ভেদি পাতালত ঠ্যাকে সে ধ্বনী!
দিদি তুই ভাল থাকিস! ভাল থাকিস তুই!!
______আশরাফুল আলম
পাঁচপীর,উলিপুর,কুড়িগ্রাম।
হালিচা:
আশরাফুল আলম