দুই চখুত নিন্দ নাই!
বুক খ্যান খালি ধুকপুক করে!
এপাক ওপাক পাশ ফেরং
কত কথা মনত পরে।
চোখুর কোনাত জমা পানি
কাজল ধুয়্যা কানত নামে,
ফিকরি ফিকরি কান্দে হীয়া
মন না পায়া মনের দামে!
সিথ্যান দেওয়া তুলার বালিশ
সাক্ষী হয়া সমায় গোনে!
কতই ভাবং তোর-ই কথা
চপররাতি মনে মনে;
তুই কি, এলাও অবুঝ?
এলাও আগের নাখান আছিস?
নাকি তুই সউগ বুঝিয়াও
না বোঝার ভান করি থাকিস?
নাকি তুই মন বিকাইছিস
নয়া কোন ভোমরা পায়া?
মন বন্ধীলু তার-ই সথে
মাথা থুলু বুকত যায়া!
নানান কথা মাথাত ঘোরে
অনিদ্রাতে হয় ভোর,
ভোক-তিয়াসের বালাই ষাট;
হীদ্দত জপে নামটা তোর।
ক্যানে তুই অমন করি?
বেখেয়ালি হয়া থাকিস,
পিরীতির সওদা পাবু;
যদি মোক ভালবাসিস।
হিয়ার মইদ্ধ্ত বসত পাবু
বুক পিঞ্জিরাত পাবু ঘর,
দেহাত খুঁজিস যত সুখ
পাবু মনের মতন বর।
হালিচা:
আশরাফুল আলম