নিন্দত থাকি উঠং যেলা নাল বেলাটাও ওঠে,
ভাল বিয়ানের মধুর গান পক্কির গলাত ফোঁটে!
সেই গান ভাসে কনেক দুর,
নয়া দিনের স্বপন দেখং সাজাং নয়া সুর।
পন্তার বেলা, হাল ধরি, দোলাত যাবার কালে,
ভাওয়াইয়ার সুর শোনং গরু হাটার তালে।
মোর মনটা ভরি যায়!
নয়া ধানের ভুঁই চষং নাঙ্গলে ফলায়।
ভর দুপুরত, চিমসা গরম,দেহা গেইলে ঝসি;
ঠান্ডা হাওয়াত জুড়াং হিয়া বটের তলত বসি।
মোর আলিসে ধরে চোখ!
মনের হাউসে নিন্দপারং ভোলং তিয়াস ভোক।
মাথাত ঝাঁপি,ঘারত গামছা, হাতত নিয়া বাঁশি, গরু ছাড়ি’দি সুর তোলং নদীর পারত বসি।
সে’টি দোলে কাশিয়ার বন,
ধরলা নদীর পাগলা বাতাস,কাড়িয়া নেয় মন!
পশ্চিয়াঁ দেওয়াত নাল বেলাটা যেলা ডুবি‘র ধরে,
গরু খেঁদেয়া মুই রাখাল ফিরি আইসোং ঘরে।
মোর দিন কাটি যায় ভাল!
মোর মতন নাই এই খাঁন্দারত রসিয়া রাখাল।
হালিচা:
আশরাফুল আলম