যার বাদে মোর গোটায় জীবন —কামতা-রাজবংশী কবিতা

মানষিটা জীবনে জিরায় নাই কুনদিন
পথ হাটিসে -
খালিসেমারী থাকি হিটারি হুটারি
তারপরে একদিন গোটায় দেশটাত
আটখুড়ি বেড়েয়া
মানসিক জাগাইসে।
মানষিটা জীবনে জিরায় নাই কুনদিন
মাথা দিয়া চিন্তা করিসে,
মুখ দিয়া ওঘুনের ফুরুঙ্গা ঝরা কথা কইসে।
হাতের কলমে নেখিয়া গেইসে বাণী,
পাও দুইটা থুইয়া গেইসে
ভৈ ভৈ পাওগারি।
মানষিটা জীবনে জিরায় নাই কুনদিন
যে জাতির বুকত ছিল না আশা
সেই জাতির বুকের মাটিত ছিটাইসে
চেতন হওয়ার বীচন।
যে জাতির মুখত ছিল না ভাষা -
সেই জাতির মুখত ফুটাইসে বুলি।
পঞ্চানন, রাজবংশী ক্ষত্রিয় জাতির
আপুরুক ধন।
তোরে পথে মোর গোটায় জীবন।
খুটাকাটি পখির নাখান
তোরে মতন মুই গছ খোকাও,
খিপ শক্ত
তাহ ঠকাও।
শুন্ শান্ দুফর, দেহা থসথসায়
হাবুরি যায় ঠোট, তাহ
তোরে কাথাত মুই শক্তি পাও-
পঞ্চানন !

____প্রেমানন্দ রায়